پی آئی اے حج آپریشن دا پہلا مرحلہ پورا کر ڳھدا، ترجمان

اسلام آباد۔23جون (اے پی پی) پی آئی اے حج آپریشن دا پہلا مرحلہ پورا کر ڳھدے۔ پی آئی اے ترجمان عبداللہ حفیظ خان ولوں جمعے کوں جاری بیان موجب گزریل رات کراچی توں جدہ آپریٹ تھیوݨ آلی پی آئی اے دی پرواز نال حج توں پہلے دا آپریشن پورا تھی ڳے۔ترجمان آکھیا جو پی آئی اے دی کل 268 پروازاں دے ذریعے 61،467 عازمین حج حجاز مقدس روانہ تھین۔ ترجمان آکھیا جو انہاں پروزاں دے ذریعے سرکاری سکیم دے تحت تقریباً 41 ہزار اتے پرائیویٹ سکیم دے تحت 19 ہزار عازمین حج اتے 600 خدام مدینہ منورہ اتے جدہ پجائے ڳن۔ پی آئی اے دا حج آپریشن 21 مئی توں شروع تھیا ہئی جیڑھا جو 22 جون تئیں جاری رہیے۔ پروازاں کراچی، اسلام آباد، لاہور ،ملتان، فیصل آباد،سیالکوٹ اتے پشاور توں براہ راست روانہ تھین۔ سکھر، رحیم یار خان اتے کوئٹہ توں عازمین حج براستہ کراچی، جدہ دا سفر کیتا۔ ترجمان آکھیا جو حج دے بعد دا آپریشن 2 جولائی توں شروع تھیسی جیڑھا جو ݙو اگست تئیں رہسی۔

مضمون کا ماخذ : اولمپس کا عروج

متعلقہ مضامین